Yauwana Janam

நாகர்கோவில் நகர் முழுவதும் ஈஸ்டரையொட்டி வண்ணமயமான "வசனப் போஸ்டர்களை" காணமுடிகிறது. இதுபோன்ற போஸ்டர்கள் என்னவிதமான தாக்கத்தை ஏற்படுத்தும் என்று நம்பி இவற்றை செய்கிறார்கள் என்று புரியவில்லை.

இதைப் படிக்கும் மக்கள் அந்த வசனங்கள் மூலம் தொடப்பட்டு இரட்சிக்கப்படுவார்கள் என்று நம்புகிறார்களா? தற்கொலைக்கு முயன்று கடலுக்கு போன ஒரு மனிதனை காற்றில் பறந்து வந்து கைகளில் சிக்கிய கைப்பிரதி காப்பாற்றிய வரலாறுகள் உண்டு. தேவன் அதிசயங்களை நிகழ்த்துகிறவர் என்பது உண்மைதான். ஆனால் இது எப்போதோ ஒரு முறை, எங்கோ ஒரு மூலையில் நடக்கும் அதிசயம்.

பத்தாயிரம் ஆயிரம் செலவிட்டு செய்யும் ஒரு விளம்பரத்துக்கு வெறும் நூறு ரூபாய்க்குத்தான் வியாபாரம் நடக்கும் (Return on investment) என்று தெரிந்தால் அதை எந்த வியாபாரியாவது செய்வானா? வியாபாரத்தில் ஞானமாக யோசிக்கும் இவர்கள் ஏன் ஊழியத்தில் யோசிக்கிறதில்லை. "நல்யோசனை செய்து யுத்தம்பண்ணு" என்று நீதிமொழிகள் 24:6 சொல்லுகிறது.

இந்த போஸ்டர் அடிக்க 5000 ரூபாய் செலவாகிறது என்று வைத்துக்கொள்வோம். இந்தப் போஸ்டர்கள்மீது இன்னும் இரண்டு நாளில் வேறு போஸ்டர்கள் ஒட்டப்படும். அதன்பின் அந்த வசனப் போஸ்டர் எண்ணமற்றுப் போய்விடும்.

ஆனால் அதே 5000 ரூபாயை மிகுந்த தேவையில் உள்ள ஒரு குடும்பத்தை சந்தித்து அவர்களோடு பழகி, அவர்களது அவசரத் தேவைக்கென்று செலவிட்டு அவர்களுடனான நட்பையும், ஐக்கியத்தையும் வளர்த்துக்கொண்டால் அது எத்தனை பயனுள்ளதாக இருக்கும்! வேதம் திரும்பத் திரும்ப வலியுறுத்துவது இதைத்தானே! ஏசாயா 58 நமது உச்சந்தலையில் உறைக்கும்படி சொல்வதும் இதைத்தானே!

இப்படிப்பட்ட உதவிகள் மூலம் அந்தக் குடும்பம் இயேசுவை அறிந்து கொள்ள வாய்ப்பிருக்கிறது, அப்படி இல்லாவிட்டாலும் அவர்களது தேவையாவது சந்திக்கப்பட்டிருக்கும், இயேசு நல்லவர், கிறிஸ்தவர்கள் அன்புக்கும் நம்பிக்கைக்கும் உரியவர்கள் என்ற எண்ணமாவது அவர்களிடத்தில் மிஞ்சியிருக்கும். ஆனால் இவர்களோ ஊழியம் என்ற பெயரில் காசைக் கொண்டுபோய் முட்டாள்தனமாக கடலில் கரைக்கிறார்கள்.

நம்மைச் சுற்றி மிகுந்த தேவையுள்ளவர்கள் இருக்கிறார்கள், அன்புக்காகவும் ஆதரவுக்காகவும் ஏங்குகிறவர்கள் இருக்கிறார்கள். மிகுந்த பிரச்சனையுள்ளவர்கள் இருக்கிறார்கள். பட்டினியோடு இரவில் தூங்கப்போகிறவர்கள் இருக்கிறார்கள், பிள்ளைகளின் படிப்புச் செலவுக்கும், மருத்துவச் செலவுக்கும் காசில்லாமல் வாடுபவர்கள் இருக்கிறார்கள். எவ்வளவு அழகாக, வண்ணமயமாக, கிரியேட்டிவாக அடித்தாலும், நாம் அடிக்கும் போஸ்டர்கள் அப்படிப்பட்டவர்களிடம் பேசாது, நம்மிடமுள்ள பணத்தை அவர்களுக்காக அக்கறையோடு செலவிட்டு நாம் அவர்களிடம் காட்டும் அன்புதான் பேசும்.