Yauwana Janam

No.3. இந்த அறிவு எல்லாரிடத்திலும் இல்லை...!

ஒரு வசனத்தை எடுத்துக்கொண்டு அதனைத் தவறாக வியாக்கியானம் செய்து அதற்கு சம்பந்தமில்லாத் இன்னொரு வசனத்தின் மூலம் அதனை உறுதிப்படுத்த முயற்சிக்கும் (மேசியாவின்) எதிரிகளின் சூழ்ச்சியை முறியடிக்க இந்த திரியில் "துளித் துளியாக விஷம்..!" என்ற தலைப்பில் (மேசியாவின்) எதிரிகளால் தவறாகக் கையாளப்படும் வசனங்களை எடுத்து ஆராய்ந்துவருகிறோம்; இந்த வரிசையில் மூன்றாவதாக அவர்களால் அடிக்கடி எடுத்துக்காட்டப்படும் வசனத்துக்குரிய விளக்கத்தை நமக்கிருக்கும் குறைந்த அறிவிலும் கொடுக்கப்பட்ட வெளிச்சத்திலும் ஆராய்வோமாக;இந்த சிறுவிளக்கைப் போன்ற வெளிச்சம் கூட இல்லாமல் தடுமாறும் (மேசியாவின்) எதிரிகளின் கண்கள் திறக்கப்பட்டு அவர்களும் சத்தியத்தை அறியவே வாஞ்சிக்கிறோம்.

• // 1 கொரி 8:6. பிதாவாகிய ஒரே தேவன் நமக்குண்டு, அவராலே சகலமும் உண்டாயிருக்கிறது; அவருக்கென்று நாமும் உண்டாயிருக்கிறோம். இயேசுகிறிஸ்து என்னும் ஒரே கர்த்தரும் நமக்குண்டு; அவர்மூலமாய்ச் சகலமும் உண்டாயிருக்கிறது, அவர் மூலமாய் நாமும் உண்டாயிருக்கிறோம். 7. ஆகிலும், இந்த அறிவு எல்லாரிடத்திலும் இல்லை.

இது இயேசுவின் தெய்வத்துவத்தை மறுக்க யெகோவா சாட்சி கூட்டத்தார்  எடுத்தாளும் மற்றொரு  வசனமாகும்;இந்த வியாக்கியானத்தை ஏற்போரும் யெகோவா சாட்சி என்றே கருதப்படுவர்.

// இந்த அறிவு எல்லாரிடத்திலும் இருக்க வேண்டிய அவசியமுமில்லை...//

வசனம் ஓகே,வியாக்கியானம்..? நான் முயற்சிக்கிறேன், 7- ம் வசனத்தில் கூறப்படும் அறிவு முதலாம் வசனத்திலிருந்தே துவங்குகிறது;எனவே இங்கே இயேசுகிறிஸ்து தொழத்தக்க தெய்வமல்ல என்று நிரூபிப்பதற்காக இது சொல்லப்படவில்லை என்பது தெளிவு.

இயேசுவானவரின் தெய்வத்தன்மையை மறுதலிக்கும் (மேசியாவின்) எதிரிகள் நாணயத்தின் இருபக்கம் போலவும் கண்ணாடியின் பிரதி பிம்பம் போலவும் இருக்கும் மையக்கருத்தை நோக்காமல் வசனத்தைத் திரிப்பதையே வேத ஆராய்ச்சி என்று நினைத்துக்கொண்டிருக்கிறார்கள்.

விஷயத்துக்கு வருவோம், மேற்காணும் வசனப்பகுதியிலுள்ள மற்றொரு உண்மை என்ன என்று பார்ப்போம்; எந்த அறிவு எல்லோரிடத்திலும் இல்லை என்கிறார்,பவுல்?

7- ம் வசனம் முழுமையும் படித்தாலே பொருள் விளங்கும்.

• "ஆகிலும், இந்த அறிவு எல்லாரிடத்திலும் இல்லை. சிலர் இன்றையவரைக்கும் விக்கிரகத்தை ஒரு பொருளென்று எண்ணி விக்கிரகத்துக்குப் படைக்கப்பட்டதைப் புசிக்கிறார்கள்; அவர்களுடைய மனச்சாட்சி பலவீனமாயிருப்பதால் அசுசிப்படுகிறது."

இது முழுக்க முழுக்க விக்கிரகத்துக்கு படைப்பவைகளைப் புசிப்பதைக் குறித்த பிரச்சினையை அலசுகிறது என்பது வெளிப்படையாகவே தெரிகிறது; ஆனாலும் இதிலுள்ள மற்ற உட்கூறுகளையும் உற்று நோக்க நாம் ஆயத்தமாக இருக்கிறோம்; மூலபாஷையின் உதவியின்றியே முதலில் பொதுவான கருத்தின்படி ஆராய்ந்தால், (மேசியாவின்) எதிரிகளுக்கு ஆதரவான சேதி இதில் ஒன்றுமில்லை. 6 -ம் வசனத்தை தவறாக வியாக்கியானம் செய்யும் நோக்கத்துடன் அவர்கள் 7- ம் வசனத்தின் முதல் பகுதியை மட்டும் கவனத்தில் கொள்ளுவதை கவனிக்கவேண்டும்;

ஆனால் 6- ம் வசனத்திலேயே நம்முடைய கர்த்தராகிய இயேசுகிறிஸ்துவின் மேன்மையை பவுலடிகள் மிக அழகாக எடுத்துரைக்கிறார்; பவுலடிகள் (மேசியாவின்) எதிரிகளில் ஒருவராக ( இருந்தார், தான் பாவி என்றுணர்ந்து மனந்திரும்பினார்...) இருந்திருந்தால் இந்த வசனத்தை எப்படி எழுதியிருப்பார்,என்று பார்ப்போம்.

• பிதாவாகிய ஒரே தேவன் நமக்குண்டு, அவராலே சகலமும் உண்டாயிருக்கிறது; அவருக்கென்று நாமும் உண்டாயிருக்கிறோம். கிறிஸ்து என்னும் ஒரே ஈடுபலி நமக்குண்டு; அவர்மூலமாய்ச் சகலமும் உண்டாயிருக்கிறது, அவர் மூலமாய் நாமும் உண்டாயிருக்கிறோம். 7. ஆகிலும், இந்த அறிவு எல்லாரிடத்திலும் இல்லை.

ஆம், (மேசியாவின்) எதிரிகள் இயேசுவானவரை சிறுமைப்படுத்தும் வண்ணமாக ஓயாமல் ஈடுபலி என்று தானே சொல்லிக்கொண்டிருக்கிறார்கள்? ஆனால் பவுலடிகளோ அவரை மேன்மைப்படுத்தும் வண்ணமாக இயேசுகிறிஸ்து எனும் ஒரே கர்த்தரும் நமக்குண்டு என்று சொல்லுகிறார் அல்லவா? இயேசுகிறிஸ்து இன்னொரு கர்த்தர் அல்ல, ஒரே கர்த்தர்; கர்த்தர் எனும் பதமானது பிதாவாகிய தேவனைக் குறிக்க மட்டுமே பயன்படுத்தப்படுவது மரபு; ஆனால் கர்த்தர் என்ற பதமானது இயேசுவானவருக்கு பயன்படுத்தப்படுவதைக் குறித்து (மேசியாவின்) எதிரிகள் கண்டுகொள்ளுகிறதில்லை; அவர்களுடைய நிலையை வலுவாக்கிக்கொள்ளவேண்டுமானால் இதுபோன்று முள்ளைப் போல குத்திக்கொண்டிருக்கும் வசனங்களையெல்லாம் திருத்தவேண்டும்;அது இயலாத காரணத்தால் தவறாக மொழிபெயர்க்கப்பட்டது என்றோ மூலப்பிரதியில இல்லாமல் பிற்காலத்தில் சேர்க்கப்பட்டது என்றோ சொல்லி தங்களுக்குத் தாங்களே குழிவெட்டிக்கொள்ளுகிறார்கள்;

பிழையான ஒரு புத்தகத்தை நீங்கள் ஏன் அவ்வளவு சிரமப்பட்டு வாசிக்கிறீர்கள்? பிழையே இல்லாத தூய்மையான புத்தகம் ஒன்று பிரபலமாக இருக்கிறதே, அங்கே போகலாமல்லவா, ஏன் எங்க பிராணனை வாங்கறீங்க?

ஒரே எனும் பதம் ஏற்கனவே பிரபல வேத வல்லுனர்கள் மற்றும் மொழியறிஞர்களின் கூற்றுப்படி ஒன்று என்ற எண்ணைக் குறிக்காது; அப்படியே அந்த ஒரே என்பது ஒன்று என்ற எண்ணையே குறிக்கும் என்று (மேசியாவின்) எதிரிகள் வாதாடுவார்களானால் அந்த ஒன்று இன்னொன்றாகவே இருக்கும்; அந்த இன்னொன்று இன்னது என்பதை வாசகரின் தீர்மானத்துக்கே விடுகிறேன்;

• // 1 கொரி 8:6. பிதாவாகிய ஒரே தேவன் நமக்குண்டு, அவராலே சகலமும் உண்டாயிருக்கிறது; அவருக்கென்று நாமும் உண்டாயிருக்கிறோம். இயேசுகிறிஸ்து என்னும் ஒரே கர்த்தரும் நமக்குண்டு; அவர்மூலமாய்ச் சகலமும் உண்டாயிருக்கிறது, அவர் மூலமாய் நாமும் உண்டாயிருக்கிறோம். 7. ஆகிலும், இந்த அறிவு எல்லாரிடத்திலும் இல்லை.//

மீண்டும் //இந்த அறிவு எல்லாரிடத்திலும் இல்லை.// என்ற கூற்றின் மறுபக்கத்தை நோக்குகிறேன்; மேற்காணும் வசனத்தில் நாம் கவனத்தில் கொள்ளவேண்டிய இன்னொரு காரியம், "அவராலே சகலமும்" மற்றும் "அவர் மூலமாய்ச் சகலமும்" எனும் வார்த்தைகள்; இதையெல்லாம் கவனிக்கும் அறிவும் கூட எல்லாரிடத்திலும் இல்லை என்கிறேன்.

நாம் விவாதிக்கும் இந்த வசனத்தைவிட்டு வெளியே செல்ல எனக்கு விருப்பமில்லை; ஆனாலும் மிகவும் முக்கியமானதொரு வசனம் நினைவுக்கு வருவதால் அதனை கவனிப்போம்,

• கொலோசெயர் 1:16 ஏனென்றால் அவருக்குள் சகலமும் சிருஷ்டிக்கப்பட்டது; பரலோகத்திலுள்ளவைகளும் பூலோகத்திலுள்ளவைகளுமாகிய காணப்படுகிறவைகளும் காணப்படாதவைகளுமான சகல வஸ்துக்களும், சிங்காசனங்களானாலும், கர்த்தத்துவங்களானாலும், துரைத்தனங்களானாலும், அதிகாரங்களானாலும், சகலமும் அவரைக்கொண்டும் அவருக்கென்றும் சிருஷ்டிக்கப்பட்டது.

மேற்கண்ட வசனத்தில் "சகலமும் அவரைக்கொண்டும் அவருக்கென்றும்" என்ற வார்த்தைகளை கவனிக்கவேண்டுகிறேன்; "அவராலே சகலமும்" மற்றும் "அவர்மூலமாய்ச் சகலமும்" எனும் வார்த்தைகளுடன் இணைத்து தியானித்தால் இயேசுவானவரின் தெய்வத்தன்மை மிக எளிதாக தெரியவரும்; பிதாவாகிய தேவனும் சரி, அவரால் அனுப்பப்பட்ட குமாரனும் சரி ஒருபோதும் தொழுகையையோ விழுந்து பணிவதையோ பிரதானப்படுத்தவில்லை; மாறாக அன்றும் இன்றும் இருவருமே கீழ்ப்படிதலையும் செவிகொடுத்தலையும் மாத்திரமே விரும்புகிறார்கள்; அதனை நிறைவேற்ற தேவ அன்பு வேண்டுமே? அந்த அன்பு இயேசுவில் தானே வெளிப்பட்டது? நம்மை நேசிப்பவரால் கொடுக்கப்பட்ட ஒரு பரிசை நாம் நேசிப்போமல்லவா? அந்த அன்பில் நிற்கவே இயேசுவானவர் வாக்குத்தத்தம் பண்ணப்பட்ட பரிசுத்தாவியாகிய வேறொரு தேற்றரவாளனை அனுப்பினார்..!

• யோவான் 14:16 நான் பிதாவை வேண்டிக்கொள்வேன், அப்பொழுது என்றென்றைக்கும் உங்களுடனேகூட இருக்கும்படிக்குச் சத்திய ஆவியாகிய வேறொரு தேற்றரவாளனை அவர் உங்களுக்குத் தந்தருளுவார்.

மேற்காணும் வசனத்திலுள்ள "வேறொரு" என்ற வார்த்தையிலேயே தேவத்துவத்தின் மூலக்கூறுகள் விளங்குகிறது; விளங்காதவர்களுக்கு எப்படி விளங்கும்? இதில் பிதா இருக்கிறார், பேசுகிறவர் இயேசுவானவர், வாக்களிக்கப்பட்டவர் பரிசுத்தாவியானவர்; இன்னும் என்ன திரித்துவத்தின் திருத்துவத்துக்கு விளக்கம் வேண்டும்? இந்த ஃபார்முலாவின் படி படித்தாலே புதிய ஏற்பாடு விளங்கும். பிதாவை ஏதோ ஆர்டிக் அண்டார்டிக் பிரதேசத்திலுள்ள பனிக்கட்டி போல கற்பனை செய்துகொண்டிருப்பவர்களுக்கு இந்த சத்தியங்கள் ஒருபோதும் விளங்காது; ஏனெனில் பிசாசானவன் அவர்களுடைய மனக்கண்களை குருடாக்கி வைத்திருக்கிறான்.

இந்த கட்டுரையானது ஃபேஸ்புக் தளத்திலும் பதிக்கப்பட்டுள்ளது.